حكايتي مع ياقوت
ريم أبو عيد
ياقوت ده حكاية غريبة بس جميلة.. أول مرة أشوفه فيها كان في اليوم اللي أخدت فيه كلاب من الشارع علشان أوديها تتعقم وتتطعم.. شفته لأول مرة وكان كلب غريب عن الشارع بتاعنا.. ورغم إنه كان أول مرة يشوفني إلا أنه كان مسالم جدا وودود في التعامل كمان.. وخدته مع الكلاب اللي راحت تتعقم في ESMA ورجع معاهم.. ولأني معرفش مكانه الأصلي فين رجعته على المكان اللي فيه باقي كلاب الشارع عندي واللي هو مش واخد عليهم أو مكنشواخد عليهم في البداية.. واختفى يومين معرفش راح فين وفجأة لاقيته موجود مع كهرمانة وعنبر.. فرحت طبعا إني شفته واطمنت عليه.. الغريب بقى إنه كان ودود جدا معايا كأننا أصحاب من زمان.. في الأول طبعا كان مبيعرفش ياكل براحته مع باقي الكلاب وكان بيخاف منهم شوية.. بمرور الوقت خد عليهم وبقى بيتحرك براحته ويلعب
ويجري وبقى مسيطر كمان :)
ياقوت حالة جميلة بجد.. وشخصية تتحب.. أيوا متستغربوش.. الكلاب كمان شخصيات مختلفة.. هو طبعا مكنش له اسم أصلا.. بس أنا اللي اختارت له اسم ياقوت.. لما شفته مع كهرمانة وعنبر اللي انا برضو اختارت لهم اساميهم.. ولأني بحب حجر الياقوت وحبيت الكلب ده جدا فمسيته على اسمه.. ياقوت حكاية جميلة ابتدت ومانتهتش وبتمنى تستمر وقت طويل ويفضل موجود في الشارع عندي أراعيه وأهتم بيه ويونسني ويمشي جنبي يحرسني زي باقي كلاب الشارع أصحابي..
ليست هناك تعليقات:
إرسال تعليق