روكي والقطيع
ريم أبو عيد
روكي والقطيع بتاعه كلاب بلدي جميلة من كلاب
شارعنا.. ويمكن بعض الناس متعرفش إن الكلاب في العموم بتعيش في قطيع ولكل قطيع
قائد.. وروكي في القطيع ده هو القائد.. القائد اللي كل أفراد القطيع بيتحركوا معاه
وبيتلموا حواليه.. أعرفكم الأول بأفراد القطيع.. دهب ومرجان وعنتر وعبلة وعسلية..
لما وديت روكي جمعية ESMA علشان يتعقم وفضل هناك حوالي عشر أيام..
الكلاب دي مكنتش بتتجمع مع بعض زي ما بيتجمعوا وهو موجود.. ولما رجع بعد المدة دي
كلها اتجمعوا حواليه في ثواني ورحبوا بيه.. يمكن المشهد ده يمر على ناس كتير عادي
ومتقفش عنده ولا تفكر في معناه.. بس أنا لأني من صغري بتأمل أحوال الحيوانات
والنباتات والحشرات بفكر في معاني تصرفاتهم واتعلم منها كتير كمان.. وزي ما اتعلمت
الإصرارا والمثابرة وعدم اليأس من النملة لما كنت صغيرة.. اتعلمت من روكي وقطيعه
معاني كتير.. معاني مبشوفهاش في كتير من الناس.. روكي لما غاب عن القطيع مافيش دكر
تاني في القطيع فكر ياخد مكانه أو يستغل غيابه ويبقى هو القائد بداله.. ولما رجع
بعد أيام مش قليلة استقبلوه وكأنه مغابش عنهم دقيقة وكانوا فاكرينه ومستنيينه
كمان.. وبعد ما رجع رجعوا تاني يتلموا حواليه ويمشوا وراه.. المشاهد دي كلها تأكد
إن الكلب مخلوق وفي ووفي جدا كمان مش بس مع أصحابه البني آدميين.. كمان بينه وبين
باقي الكلاب.. الكلاب عندها نظام في حياتها بتحترمه وبتحافظ عليه.. لو عرفنا
نشوفهم صح هنتعلم منهم معاني كتير بقت غايبة عن مجتمعنا البشري وبقينا مفتقدينها
للأسف بينا وبين بعض.. ما فيش كلب بيغدر بصاحبه ولا بيستغل فرصة غيابه وياخد
مكانه.. ما فيش كلب بينسى الأصول مع كلب تاني مهما مر من وقت.. الكلاب كل ما
بتعامل معاها بتأكد أكتر وأكتر إنها أرقى سلوكا من ناس كتير في زماننا الحالي مع
الأسف الشديد.. هي صحيح كلاب شارع.. بس بتتعامل بأخلاق بينها وبين بعض وبتراعي
الأصول مع بعض.. يا ريت نتعلم من الحيوانات اللي ربنا خلقها.. الحيوانات والطيور
والحشرات كمان ممكن تعلم الإنسان دروس كتير جدا.. بس بشرط يكون عنده استعداد يتعلم
وميستكبرش.. ومينساش إن الغراب علم قابيل إزاي يدفن هابيل بعد ما قتله.. بس أحفاد
قابيل ورثوا عنه القتل ونسيوا إن الغراب هو اللي علمه إزاي يدفن القتيل.. في نهاية
كلامي ده عايزة اقولكم ان روكي وقطيعه مش مجرد كلاب عايشة في الشارع دول عالم
ودنيا.. دنيا جميلة جدا ميحسش بجمالها إلا اللي عنده استعداد يفهم ويتعلم..
ليست هناك تعليقات:
إرسال تعليق