الكلاب البلدي ثروة قومية
أيوا
أنا قصدت المعنى ده حرفيا.. ثروة قومية.. واسألوا الأجانب اللي بياخدوا كلاب بلدي
يسافروا بيهم لبلادهم ويربوهم في بيوتهم.. الكلب البلدي ذكي جدا واذكى من انواع
كتير تانية.. وفي ومخلص.. ومطيع.. وشاطر جدا في الحراسة.. يعني إحنا عندنا كلاب
حراسة ببلاش.. نقدر ندربها ونستخدمها في حراسة المنشآت العامة بدل ما نستورد كلاب
من برة.. يعني هنوفر عملات أجنبية.. يعني ده هيفيد اقتصاد الدولة.. لو قدرنا قيمة
الكلب البلدي صح الناس هتشوفه صح وهتبدأ ثقافتها تتغير وتتقبل إنها تربيه في
البيوت بدل أنواع الكلاب اللي بنجيبها من برة ومبتتحملش حرارة الجو عندنا.. الكلب
البلدي بيعرف يتأقلم مع درجات الحرارة بتاعة بلدنا.. يعني لو شجعنا الناس إنها
تربي الكلاب البلدي في البيوت بدل الكلاب اللي من الأنواع اللي بنستوردها هنحل جزء
كبير جدا من مشكلة انتشارهم في الشوارع بأعداد كبيرة..
طبعا مش
ده فقط الحل.. الحلول كتير وكلها حلول إنسانية ورحيمة.. يعني بدل الحملات الممنهجة
اللي بتتعمل ضد كلاب الشارع وتحرض على قتلهم.. ليه منعملش حملات تنظيف للشوارع من
القمامة المتراكمة فيها واللي بيتجمع حواليها الكلاب والقطط علشان يدوروا على
أكل.. واللي بتتسبب في انتشار الأمراض كمان وبيتجمع عليها الذباب والحشرات.. ده
غير الفيران طبعا.. وبالمناسبة الفيران هي كمان بتنقل مرض السعار وهي اللي ممكن
تنقله لكلاب وقطط الشارع.. يعني المشكلة الحقيقية في شوارعنا مش وجود وانتشار
الكلاب.. إنما انتشار القمامة وتراكمها..
الكلاب
اللي هتفضل موجودة في الشارع ومش هتستخدم في حراسة المنشآت ولا التربية في
البيوت.. نقدر برضو نطعمها هي كمان ضد السعار وبكده نضمن إن ما فيش منها أذى على
أي إنسان.. وممكن كمان نعقم بعضها علشان نحد من انتشارها بشكل كبير.. لو وجودها
بعدد كبير بيخوف بعض الناس.. والأهم من كل ده نصحح مفاهيم الناس الغلط عن الكلاب
وننشر ثقافة الرحمة في المجتمع.. ونعلم الناس إزاي تتعامل مع الكلاب بطريقة صحيحة
علشان نضمن سلامة الإنسان والحيوان في نفس الوقت..
الحلول
دي كلها قابلة للتطبيق على أرض الواقع.. مش مستحيلة ومش صعبة.. يمكن تكون محتاجة
شوية مجهود وتعب من كل الناس علشان تتحقق.. بس في النهاية تحقيقها مكسب للكل
برضو.. إنما اللجوء للحل السهل وهو القتل.. فده مالوش نتيجة غير الخسارة.. خسارة
اللي بيقتلهم دنيا وآخرة لأن ربنا حكم عدل ومنتقم جبار ومبيجاملش في الحقوق.. ودي
جريمة قتل نفس.. وخسارة للمجتمع كله لأن الكلاب وجودها مهم في حياتنا لأنها
بتحمينا من حاجات تانية كتير منقدرش عليها.. زي التعابين والذئاب اللي ممكن تتنشر
لو مافيش كلاب نهائي.. ده مش كلام نظري دي حقايق.. وحصلت بالفعل في أكتر من
واقعة.. منهم واقعة حصلت في قرية في القنطرة سنة 1994.. أهالي القرية اتخلصوا من
الكلاب البلدي في الشوارع والنتيجة إن الذئاب بقت تهاجمهم بشكل يومي وأكلت مواشيهم
وسببت لهم فزع كبير ولجأوا لوحدة القوات المسلحة اللي كانت قريبة منهم ولأن الذئاب
سرعتها عالية في الجري ولأن فيه بيوت سكنبية مكنش ينفع اصطيادهم بالرصاص الحي..
فوحدة القوات المسلحة جابت لهم كلاب بلدي من منطقة تانية وأطلقتهم في الشوارع بعد
كام يوم كانت الذئاب اختفت تماما.. في القاهرة الجديدة مؤخرا بدأت التعابين تظهر
في المناطق اللي حصل فيها حملات تسميم جماعية لكلاب الشارع.. معنى كده إن وجود
كلاب الشارع مهم وضروري.. ولو فيه بعض المشاكل من تكاثر عددهم فالحلول موجودة
وقابلة للتطبيق ومن غير أذى للكلاب ولا للإنسان.. لأن القضاء تماما على الكلاب
مؤذي للإنسان برضو.. فإحنا كده نبقى بنأذي نفسنا بنفسنا كمان مش بس بنرتكب جرايم
قتل نفس هيحاسبنا عليها ربنا في الدنيا والآخرة.. بس مين قال إن الكلب البلدي مش
محبوب؟ مين قال إنه مؤذي ومتوحش ولازم نتخلص منه؟.. طبعا فيه ناس قالت ده.. بس
الناس دي فاقدة إنسانيتها.. وناسية إن للكون إله هو اللي خلق الكلب البلدي زي ما
خلقهم.. وناسية كمان إن فيه ناس كتير تانية غيرها بيحبوا الكلاب البلدي وبيهتموا
بيها وبيراعوها سواء في بيوتهم أو في الشارع.. وعلشان أثبتلكم إن ناس كتير أوي
بتحب الكلب البلدي.. صفحة ريتا فريش فوود على فيسبوك عملت مسابقة للفانز بتوعها..
الصفحة بقالها 3 سنين من عمر الشركة بتاعتهم.. ريتا فريش فوود مش بس بيعملوا أكل
للكلاب والقطط دول كمان بيدعموا الكلاب البلدي بحملات.. طيب إيه الإثبات في كل
الكلام ده إن ناس كتير بتحب البلدي؟ أكيد كلكم بتسألوا السؤال ده.. نتيجة المسابقة
اللي عملوها واللي موثقة بتعليقات المشاركين فيها.. خلوني أقولكم الأول إن عدد
متابعين الصفحة 17 ألف.. والمسابقة كانت
للتصويت على أكتر نوع كلب الناس بتحبه.. وكانت المفاجأة لكل فريق عمل ريتا فريش
فوود إن الكلب البلدي هو اللي فاز وبنسبة قاربت الأربعين في المائة من مجموع
الأصوات.. عارفين ده معناه إيه.. إن ربنا مبيتعاندش.. يعني كل ما فيه أصوات بتعلا
وتنادي بإبادة الكلاب البلدي.. وكل ما فيه نفوس شريرة بتتبنى حملات لتسميم الكلاب
البلدي في الشوارع.. كل ما ربنا بيسخر للكلاب دي ناس كتير تحبهم أكتر وتراعيهم في
الشوارع وتربيهم في البيوت.. الكلاب البلدي هتفضل موجودة وعايشة وسط الناس في
المجتمع لأن
ربنا خلقهم لحكمة وسبب.. وإنت عليك تختار تكون من الناس اللي جواها خير وبترحم
مخلوقاته الضعيفة علشان ربنا يرحمك إنت كمان.. ولا من الناس المؤذية المجرمة اللي
ضميرها مات وقاطعة تذكرة اتجاه واحد لجهنم.. آه متستغربوش ما هو أكيد قتل النفس
وتعذيب المخلوقات الضعيفة مش حاجة هينة عند ربنا.. وهو اللي بيقتص لهم في الدنيا
والآخرة.. ما
هو أكيد ربنا مش هيجاملكم في دمهم..
ليست هناك تعليقات:
إرسال تعليق