صدفة كمان وكمان
ريم أبو عيد
يوم 10 يناير 2020 صحيت على رسالة جميلة من مي صديقتي الجميلة اللي بتشتغل في مؤسسةالفرسان لذوي الاحتياجات الخاصة اللي جنب بيتي.. بتقولي فيها إن صدفة الكلبة البلدي صاحبتي الغريبة عن شارعنا موجودة في الشارع.. نزلت جري علشان أشوفها وحطيت لها أكل.. وطلعت البيت ونزلت تاني علشان أروح العيادة البيطرية Petzinia أطمن على سفروت اللي بيتعالج هناك وهو كمان جرو بلدي من كلاب الشارع عندي.. لاقيت صدفة لسه موجودة ومستنياني.. ومشيت معايا وجنبي من البيت لغاية ما وصلت العيادة ورجعت معايا تاني من العيادة لغاية البيت.. حوالي ربع ساعة مشي رايح وربع ساعة مشي راجع.. عرفت من الدكتور مصطفى عمر إن صدفة عندها أربع سنين وده عمر كبير بالنسبة لكلبة شارع.. وبالرغم من سنها الكبير ده وبالرغم من إن المشوار طويل فضلت معايا وجنبي تحرسني وتونسني طول الطريق.. وقعدت قريب من بيتي لما وصلنا الشارع بتاع البيت.. حطيت لها مية جنبها.. وطلعت.. بس تاني يوم ملقتهاش في الشارع بتاعنا.. أنا معرفش مكان صدفة فين في الشوارع اللي جنب البيت عندي.. لكن كل اللي أعرفه إن لها مكان في قلبي ومكان كبير أوي كمان.. وسواء قابلتها بعد كده ولا لأ.. هتفضل لها مكانها في قلبي وروحي.. وهتفضل أجمل صدفة..
ليست هناك تعليقات:
إرسال تعليق