اسمه كلب شارع مش كلب ضال
ريم أبو عيد
رغم إني بكتب كل مقالاتي بالفصحى الصحيحة إلا إني المرة دي هكتب المقال بالعامية البسيطة علشان يكون أقرب لكل الناس اللي هتقراه أو اللي بتمنى إنها تقراه.. وخليني أسميه دردشة معاكم مش مقال في صورته المعتادة والتقليدية.. عايزة أتكلم عن مصطلح بيتم استخدامه وتداوله من الناس كلها وهو خاطىء أصلا في الاصطلاح والمعنى.. مصطلح (الكلب الضال).. اللي الحقيقة معرفش بيتقال على كلاب الشارع ليه وعلى أي أساس وبأي معنى كمان.. كلب الشارع اسمه كلب شارع مش كلب ضال.. لأن ضال في اللغة كل معانيها ليس لها علاقة ولا صلة بأي حيوان عايش في الشارع أو أي شخص كمان عايش في الشارع.. يعني الناس اللي عايشة في الشارع بنقول عنهم بلا مأوى مش ناس ضالة.. وبلا مأوى بتتقال على الناس اللي عايشة في الشارع لأن الطبيعي إن البني آدم يكون له سكن ومكان يعيش فيه.. بس مينفعش تتقال على كلاب الشارع لأن الطبيعي إن كلاب الشارع تعيش في الشارع.. ده بيتهم ومأواهم فبرضو مينفعش نقول إنهم كلاب بلا مأوي.. اسمهم كلاب الشارع.. دي التسمية السليمة والتوصيف الصحيح.. نرجع لمصطلح كلاب ضالة اللي تم تحريف حتى معناه الخاطىء علشان يبقى معنى يتم الهجوم بيه على كلاب الشارع وكأنهم كلاب مؤذية ومتوحشة ووجودها في الشارع خطر على الناس وده مش حقيقي طبعا.. فإيه معنى ضال في اللغة؟ لها أكتر من معني منها المنحرف عن الطريق القويم.. ومنها التائه.. ومنها المفقود.. ومعاني تانية كتير كلها معاني متقاربة للمعاني السابقة.. ومافيش منهم معنى خالص له علاقة بكلاب الشارع.. لأن كلاب الشارع ببساطة عارفة مكانها في الشارع وحافظاه فلا هي تايهة وعلى منحرفة عن مسارها ولا مفقودة ولا أي معنى من ده.. استخدام لفظ ضال ومشتقاته في القرآن الكريم كمان كل المواضع اللي جاء فيها بتدل على نفس المعاني اللغوية اللي أنا ذكرتها.. فلغويا واصطلاحا مينفعش خالص يتقال على كل الشارع كلب ضال.. والمشكلة بقى إن حتى المعاني الصحيحة للفظ ضال لما تم استخدم اللفظ لوصف كلاب الشارع تم تحريف المعنى علشان يوصف كلاب الشارع أوصاف هي بريئة منها تماما وتبقى مرادف لكل ما هو مؤذي ويخوف الناس من الكلاب دي.. فلفظ ضال ممكن يتوصف بيه بعض الناس ويبقى معناه صحيح مش شتيمة يعني.. لكن مالوش أي أساس من الصحة في وصف كلاب الشارع.. والحقيقة إن المجتمع فعلا فيه ناس ضالة كتير.. ناس مؤذية.. ناس جاهلة.. ناس متعرفش رحمة ولا إنسانية.. ولا عندها دين ولا ضمير.. أشكال ضالة لا بيقروا قرآن ولا يعرفوا ربنا أصلا ولا حتى يعرفوا لغة عربية سليمة.. الأشكال الضالة دي هي اللي خطر على المجتمع مش كلاب الشارع هي اللي خطر.. اقروا قرآن يمكن تفهموا معنى كلمة ضال إيه بكل مشتقاتها.. ويمكن تتعلموا الرحمة والإنسانية من آيات ربنا المحكمات.. يمكن ضمايركم تصحى وتسيبوا مخلوقات ربنا اللي في الشارع في حالها.. يمكن يبقى عندكم إنسانية وتبطلوا أذى في كلاب الشارع.. كلاب الشارع اللي ربنا خلقها تعيش في الشارع.. وخلقكم علشان يختبركم هتعاملوها برحمة علشان تستحقوا رحمته في الدنيا والآخرة ولا هتفتروا عليها وتسمموها وتعذبوها فيلعنكم في الدنيا وتبقوا حطب جهنم في الآخرة.. بعض البشر هما اللي فعلا أشكال ضالة وهما اللي خطر حقيقي على المجتمع وباقي الناس.. مش كلاب الشارع هي اللي ضالة وخطر..
ليست هناك تعليقات:
إرسال تعليق