رد على بعض أعضاء نادي الصيد اللي بيطالبوا بالتخلص من القطط ريم أبو عيد

للأسف نادي الصيد بقى فيه مشاكل كتير جدا وأولها وجود بعض الأعضاء فيه اللي اسلوبهم وتعاملاتهم مع الآخرين فجة وأقرب للوقاحة واللي فاكرين إن النادي ملك خاص لهم من حقهم يمنعوا غيرهم من التصرف بحرية فيه ومن حقهم كمان يمنعوا وجود القطط فيه اللي هي وجودها طبيعي في النادي لأن ده نادي ومفتوح على الشارع يعني القطط عادي تدخله.. اتفهم جدا خوف البعض من القطط.. وأتفهم عدم حب البعض لهم وكل دي حقوق مشروعة لأي حد وكمان أتفهم عدم رغبة البعض في وجود القطط في اماكن تواجد الأعضاء كل دي أمور مقبولة ولها حلول ومن حق اللي بيطالب بيها.. لكن المطالبات بالتخلص من القطط والقضاء عليها بحجة إنها متوحشة وبتهاجم فده كلام فارغ لا يصدر إلا عن ناس خيالها واسع حبتين.. القطط حيوانات أليفة مش حيوانات مفترسة وبالرغم من ده حق اي حد ميحبهاش أو يرفض انها تقرب منه.. بس مش من حق حد يمنع غيره من الرفق بيها واطعامها.. نادي الصيد بقى زيه زي المجتمع المصري اللي بقى فيه ناس معدومة الرحمة والضمير والانسانية والدين كمان.. كل همهم وشغلهم الشاغل ازاي يتخلصوا من اي حيوانات أليفة بأي حجج.. حتى لو هيسمموهم ويقتلوهم.. وكأن ربنا خلق لهم الأرض لهم لوحدهم.. وكأنهم ميعرفوش ربنا أصلا.. والغريب ان اللي   بيشتكوا بيستهزأوا بأي حلول يتم اقتراحها وكأنهم مش عايزين يحلوا وعايزين يشتكوا وبس.. شيء بقى مثير للقرف الحقيقة إن نادي عريق زي نادي الصيد يبقى فيه نماذج بالشكل ده اللي لا احترام في الكلام مع غيرها ولا تفكير سليم ولا رحمة ولا منطق.. بالنسبة لهم وجود القطط شيء مش مقبول لكن حلل المحشي على ترابيزات النادي في التراس نشاط اجتماعي.. حاجة غريبة بجد جدا الحقيقة!!