حكايتي مع كلاب الشارع

حكايتي مع كلاب الشارع

   بدون مبالغة حكايتي مع كلاب الشارع بعتبرها من أجمل حكايات حياتي.. مش بس لأني تخلصت من خوفي منهم وقدرت أتعامل معاهم وأنا مطمنة.. كمان علشان فعلا التعامل معاهم عن قرب خلاني أحس بمشاعر جميلة كتير.. أي إنسان لما بيعمل خير بقعة النور اللي جوا نفسه بتزيد وتكتر وتملا روحه وقلبه وكيانه.. ومع كل عمل خير كل ما روحنا بتنور أكتر.. لدرجة إحنا نفسنا منتصورهاش.. وعارفين يعني إيه تعطفوا على حيوان أبكم غلبان لا حول له ولا قوة ميقدرش يتكلم ويقول جعان أو عطشان أو عيان.. ويعني إيه تعاملوه برحمة ورفق.. يعني ثواب كبير أوي عند ربنا.. يعني ربنا يكون جنبكم في كل خطوة بتعملوها.. ويحميكم من شرور كتير أوي.. ويجبر بخاطركم زي ما بتجبروا بخاطرهم.. أنا من وقت ما بقيت أنزل أكلهم بنفسي وألعب معاهم وأطبطب عليهم وأحسسهم بحبي لهم.. والله العظيم بقت فيه حاجات كتير بتحقق لي قبل حتى ما أطلبها.. منها الكتاب ده مثلا.. أنا كنت عايزة أعمل حملة توعية للناس إزاي يتعاملوا مع الكلاب البلدي علشان ميخافوش منهم.. بعد حملات العنف ضدهم ما زادت وقتلهم وتسميمهم بكل وحشية وجبروت ما انتشر.. لاقيت حسام عزام بيكلمني وبيطلب مني أعمل كتاب عنهم.. ربنا بعت لي الحل من عنده.. وفي لحظة ما فكرت.. ده مثال وفيه أمثلة تانية كتير.. هكلمكم عنها في أي ندوة هعملها عن الكتاب أو عن الرحمة والرفق بالحيوانات إن شاء الله.. لكن دلوقتي خلوني أكلمكم  عن إزاي تتخلصوا من خوفكم من الكلاب البلدي في الشارع.. وتقربوا منهم وتتعاملوا معاهم.. علشان أنا متأكدة إن لو مرة واحدة بس قربتوا منهم من غير خوف هتحبوهم.. ولما تحبوهم هترحموهم.. ولما ترحموهم هنرحم كلنا بعض في المجتمع.. لأن الرحمة مبتتجزأش..

   طبعا عارفة إن فيه ناس بتقول البني آدم أولى.. وأنا عن نفسي اتقالي الكلام ده كتير سواء على صفحتي على فيسبوك أو حتى في الشارع وأنا بأكل الكلاب والقطط.. بس الجملة دي نفسها من الثقافة الغلط عند بعض الناس.. الخير مافيهوش أولى وأهم.. الخير كله مهم.. كل عمل خير كبير أو صغير بتعمله ربنا بيديلك ثواب عليه.. ومافيش من شروط الخير إنه يكون لبني آدم فقط.. وبالرغم من ده فاللي الناس لازم تعرفه إن اللي بيرحم الحيوان بالضرورة بيرحم الإنسان مافيش أي تعارض يعني خالص.. واللي بيساعد الحيوانات طبيعي برضو بيكون بيساعد الناس المحتاجة.. بس مثلا أنا مش هصور الناس اللي بساعدهم لا هنشر مساعداتي لهم على صفحتي لأنه أكيد عيب وفيه جرح لكرامتهم ومساعدتنا لغيرنا مش علشان نتمنظر بيها دي بتكون لله يعني لازم تفضل بينا وبينه.. أما كلامي عن الكلاب والقطط والصور والفيديوهات اللي بصورها وأنا واقفة وسطهم بلعب معاهم أو بأكلهم.. فدي علشان الناس تطمن إنهم مش كائنات مؤذية ولا متوحشة ولا مفترسة زي ما بعض الناس بتتصور مش لأني بهتم بيهم فقط وبتجاهل شخص محتاج مساعدة.. والناس اللي بتردد جملة البني آدم أولى.. إنت في الحالتين هتاخد ثواب.. جرب تساعد بني آدم محتاج وتأكل حيوان جعان.. جرب على أد مقدرتك.. وهتعرف إنك إنت الكسبان في الحالتين.. لأنك هتحس بالنور اللي بيملا قلبك والراحة والسكينة اللي بتزيد جواك كل مرة بتعمل فيها عمل خير.. الخير مافيهوش أولويات.. الخير مطلق.. ومتستقلش بلقمة صغيرة تسد بيها جوع حيوان مسكين مش قادر يقولك إنه جعان ولا بنقطة مية بتسقيها لقطة أو كلب عطشانين..  

   افتكروا دايما إن فيه راجل دخل الجنة لأنه سقى كلب عطشان وامرأة مصلية دخلت النار لأنها حبست قطة ومنعت عنها الأكل..

   عايزين تجربوا بس خايفين.. خليني أحكي لكم أنا إزاي تخلصت من خوفي منهم.. وإزاي كمان ساعدت غيري يتخلص من خوفه.. يمكن تقدروا إنتوا كمان تعملوا زيي.. وتعيشوا نفس التجربة بكل مشاعرها الجميلة.. وتساعدوا غيركم يفهم ويعرف.. علشان في النهاية نرجع الرحمة تاني لمجتمعنا ونعيش كلنا في أمان وسلام.. وعلشان ده يحصل فيه معلومات مهمة محتاجين تعرفوها.. أو بمعنى آخر تصححوا مفاهيمكم فيها..

   كلاب الشارع دايما هتلاقوها بتعيش في مجموعات.. وده طبعا اللي بيخوف ناس كتير منهم.. مع إن الكلب اللي عايش وسط مجموعة ده بيبقى كلب سليم مش مصاب بالسعار يعني مش لازم تخافوا منه.. الكلب المسعور بيعتزل الكلاب.. هو عموما الكلب لما بيمرض بيعتزل اللي حواليه.. فلما تلاقوا كلاب في مجموعة وبتتعامل مع بعضها طبيعي اعرفوا إن مافيش بينهم كلب مسعور.. لأن السعار ده بيصيب الجهاز العصبي وبيعمل خلل في التصرفات يعني الكلب المسعور بيهاجم الكلاب زي ما بيهاجم الإنسان بالظبط.. فلو لاقيتوا مجموعة كلاب مع بعضها وبتتعامل طبيعي مع بعض متقلقوش يكون بينهم كلب مسعور.. طبعا كلامي مش معناه تستهينوا بعضة أي كلب منهم.. لو لا قدر الله كلب عض بني آدم أو قطة عضته أو خربشته طبعا لازم يروح ياخد جرعات السعار كلها كإجراء وقائي.. لأن السعار بيؤدي للوفاء.. ومعنى ده كمان إن الكلب المسعور نفسه بيموت في فترة زمنية مش طويلة يعني في حدود اسبوعين مثلا..

   طيب اطمنتوا إن الكلاب مش مسعورة.. لأن عادة الخوف بيكون من إن الكلاب تعضنا في الشارع.. فلو عرفنا إنها مبدئيا مش مسعورة طالما عايشة في مجموعة.. يبقى الخطوة اللي بعد كده نفهم ليه الكلاب ممكن تجري ورانا أو تنبح علينا.. ده بيحصل طول ما احنا خايفين منهم.. لأن حاسة الشم عن الكلب قوية جدا.. وبيشموا ريحة الخوف فينا.. لأننا وإحنا خايفين افراز الادرينالين في أجسامنا بيزيد.. والكلاب بتقدر تشمه.. بالنسبة لفطرة الكلاب اللي ربنا خلقهم عليها.. إنك تكون خايف معناها إنك بتديله إشارة إنه ممكن يهاجمك وبيهاجمك مش لأنه شرير أو مؤذي.. لا خالص.. بس بيكون رد فعل منه دفاع عن نفسه تحسبا لأي هجوم يبدأ من ناحيتك.. طيب لو جرينا من كلب في الشارع؟ تبقى كارثة طبعا.. لأنه لازم هيجري ورانا.. كلامي ده مش علشان أخوف حد أكتر ما هو خايف.. كلامي ده علشان أقول لكل الناس اللي بتخاف من الكلاب إن الحل في إيديكم انتم وإن المشكلة مش في الكلاب أصلا.. أنا عن نفسي كنت بخاف منهم جدا زي ما قلتلكم في أول الحكاية.. بس لما بطلت أخاف بطلوا يخوفوني.. أنا اللي اتغيرت مش الكلاب.. ولما اتغيرت وعرفت اتعامل بطريقة صح.. قدرت اقرب منهم وقربي منهم خلاني أعرفهم أكتر وأحبهم كمان جدا.. ولما حبيتهم إحساس حبي لهم وصل لهم ولاقيت منهم حب ملوش حدود ولا وصف.. اللي عايز يتغلب على خوفه من الكلاب.. يجرب مرة يأكلهم.. ممكن تحطوا لهم أكل من مسافة وتبعدوا لو خايفين والكلب هيقرب وياكل ومش هتلاقوا منه أذى.. ومرة بعد مرة قربوا خطوة كمان.. هتكتشفوا إن مافيش حاجة أصلا تخوف.. فيه أصدقاء ليا جربوا يعملوا ده وتخلصوا من خوفهم فعلا واكتشفوا إن الكلاب مخلوقات جميلة وبقوا يحبوهم كمان جدا.. أما لو فضلتوا خايفين ومش عايزين تتعاملوا معاهم خالص فطبعا ده حقكم المطلق في الحالة دي تجنبوا تمشوا جنبهم.. بس اللي أكيد إنه مش من حق حد إنه يقتلهم أو يحرض على قتلهم لمجرد إنه خايف منهم.. لأن معنى كده إن مبدأ العنف والقتل هينتشر في المجتمع وهيهدد أمننا كلنا بعد كده..

   عارفة إن فيه ناس هتقول إن الكلاب كتير في الشارع وإنهم مش هيقدروا يتعاملوا معاهم خالص ولا هيقدروا يتخصلوا من خوفهم.. فيه حلول كتير غير القتل.. وهتكلم عنها في آخر الحكاية..

   دلوقتي خلوني أحكي لكم حكايتي أنا مع كلاب الشارع عندي.. في يوم بالليل وكنا في اخر شهر مايو وقبل كاس الأمم الافريقية كنت رايحة البنك اللي قريب من بيتي علشان أسحب فلوس من ماكينة الصراف الآلي.. سمعت صوت كلبة بتصرخ بس مكنتش شايفاها لأن الدنيا مضلمة.. أنا طبعا كنت بطلت أخاف من الكلاب.. بس صوت صريخها وجع قلبي وسألت الحارس هناك قالي انها مسعورة وانها أكلت جرو من جراويها.. استغربت.. هي لو مسعورة فعلا كانت هتهاجم الناس كلها.. بس دي كانت قاعدة في الجنينة وكأنها بتبكي.. سألت وعرفت إن فيه عربية خبطت جرو من جراويها وموتته وخبطتها هي وكسرت لها رجلها.. هي من خوفها على الجرو التاني أكلته.. دي غريزة في الحيوانات ربنا خلقها بيها أوقات من خوفهم على عيالهم بيتصرفوا كده يعني مينفعش نعتبرها تهمة ونحاسبها عليها.. المهم.. تاني يوم رحت الجنينة والدنيا لسه نهار وخدت معايا طبق كبير أحط فيه مية وطبق تاني كبير للأكل.. كانت الجنينة فيها حوالي خمس كلاب.. في البداية كانوا خايفين وبيبعدوا.. خايفين لأنهم اتأذوا من ناس مؤذية.. اللي بيحدفهم بطوبة واللي بيضربهم برجله.. أنا حطيت لهم الأكل والمياه ووقفت بعيد شوية بدأوا ياكلوا ويشربوا.. تاني يوم كانوا لسه خايفين شوية.. تالت يوم سابوني اقرب منهم واكلوا وانا واقفة جنبهم من غير خوف ولا قلق.. فضلت اراعيهم لغاية ما الكلبة دي رجلها خفت.. واختفوا فترة وقت كاس الامم الافريقية.. وبعدها رجعت شفتهم تاني.. الكلبة دي منستنيش من لحظة ما قربت منها وطمنتها واهتميت بيها وراعيتها.. بقت صاحبتي وجدا كمان.. بقت كل ما تشوفني تجري عليا وتهز ديلها معناها إنها فرحانة بوجودي.. في يوم رحت أحط لها أكل لاقيت معاها حوالي حداشر كلب.. ايوا زي ما قريتوا العدد كده بالظبط.. كلاب ميعرفونيش ومشافونيش قبل كده.. وبالرغم من ده انا مخوفتش منهم.. خلاص أنا بقى جوايا طاقة حب كبيرة لهم.. والاحساس ده بيوصلهم من غير كلام.. والكلبة صاحبتي هي نفسها طمنتهم من ناحيتي..

   الكلاب دي لما كنت أنزل أحط لها أكل وحد غريب يقرب من المكان اللي انا واقفة فيه معاهم كانوا يسيبوا الاكل ويقفوا في دايرة حواليا لغاية ما الشخص الغريب ده يعدي من المكان ويبعد.. بيعملوا كده حماية ليا.. تخيلوا دي كلاب شارع.. كلاب بلدي من اللي ناس كتير مبتحبهومش وبتحتقرهم.. محدش دربهم على حماية اصحابهم.. بس فطرتهم الجميلة علمتهم ده.. الكلاب دي لما بيشوفوني ماشية مع ليو الكلب بتاعي مستحيل ينبحوا عليه أو يهاجموه.. عادة الكلاب بتنبح على كلب غريب عنهم علشان تقوله ان دي منطقة نفوذهم ميقربش منها.. بس مبيعملوش ده وليو ماشي معايا.. معناها إنهم كلاب ذكية جدا.. الكلاب دي متعايشة مع قطط الشارع ومبيتخانقوش معاهم ولا بياكلوهم ولا بيفترسوهم.. لأن الكلاب والقطط مش أعداء زي ما ناس كتير متصورة  من ضمن التصورات الخاطئة الكتير اللي عندهم عن الكلاب والقطط.. كلاب وقطط الشارع اللي انا بأكلهم بيقفوا جنب بعض في سلام ياكلوا من غير ما يتخانفوا..

   الكلبة اللي بحكي لكم عنها أنا سميتها شقاوة.. لأنها بقت كل ما تشوفني تجري عليا وتنط بفرحة حواليا.. شقاوة بعد ما كانت بتخاف من الناس جدا.. بقت تقرب منهم من غير خوف وكل الناس اللي بتروح عند البنك بقوا يعرفوها ويحبوها ومبيخافوش منها.. لدرجة انها بالليل بتنام في الباب الدوار بتاع البنك علشان تحرسه كمان.. دي الكلاب البلدي اللي بعض الناس بتفتري عليها وتقول إنها متوحشة وبيحرضوا على قتلها كلها.. الكلاب دي ربنا خلقها تعيش وسطنا وتحمينا وتحرسنا.. مخلقهاش عبث.. حتى الكلب المسعور.. مينفعش نموته بالسم.. لأنه ببساطة بيمتنع تماما عن الاكل والشرب.. وهو لوحده بيموت.. بس لو لازم نموته.. يبقى برصاصة تقتله فورا ومن غير ما تعذبه ونموته هو لوحده مش نقتل كل الكلاب في الشارع لأن كلب منهم مسعور.. يعني اللي بيرموا أكل مسموم للكلاب على اعتبار إنهم بيموتوا كلاب مسعورة بيرتكبوا جريمة قتل نفس بغير حق.. لأن اللي بياكل الأكل المسموم ده ومعدته تتقطع ويتعذب لغاية ما يموت كلب جعان مش كلب مسعور..  عرفتوا إن مفتاح الخير ومفتاح الشر في ايد البني آدم.. اللي ربنا كرمه بالعقل وكلفه وهيحاسبه على أفعاله.. والاختيار كمان له يا إما يكون مفتاح خير يا إما يكون مفتاح شر..

   مش بس الكلبة شقاوة والكلبة سكرة ودي كلبة بلدي تانية وكل الكلاب اللي معاهم هما لوحدهم اللي أصحابي في الشارع.. إنما كمان كل الكلاب اللي في كل الشوارع حوالين بيتي.. وأي كلب بقيت أشوفه في أي شارع مبقتش أخاف منه ولا بقى بينبح عليا أو يجري ورايا.. بالعكس تماما.. كلاب الشارع بقت مسالمة جدا معايا حتى اللي ميعرفونيش.. لأني أنا بطلت أخاف.. مبقوش يشموا جوايا ريحة الخوف.. إنما بقوا بيحسوا بطاقة الحب اللي جوايا ناحيتهم..

   كلاب الشارع عندي اللي لسه والدة وجروايها صغيرة مبتخافش كمان على جروايها مني.. الكلاب لو اطمنت لإنسان وحبته هتفديه بحياتها مش بس هتقابل حبه لها بحب أكبر.. حبوهم وارحموهم هتكسبوا كتير في الدنيا والآخرة.. جربوا مش هتخسروا حاجة بالتأكيد..